Samarqandda avtobus yo‘lini to‘sganlar ushlandi
Bu haqda viloyat IIB matbuot xizmati maʼlum qildi.
Maʼlum bo‘lishicha, 2023 yil 28 iyul kuni soat taxminan 14:00da Jizzax viloyati “G‘allaorol” tumani hududidan o‘tuvchi M-37 avtomobil yo‘lida viloyatlararo yo‘lovchi tashuvchi avtobus haydovchisi, u bilan bir yo‘nalishda harakatlanib ketayotgan “Damas” rusumli avtomashina haydovchisi yo‘liga chiqib ketishi oqibatida haydovchilar o‘zaro yo‘l talashib, tortishib qolishgan.
Shundan so‘ng, “Damas” haydovchisi Y.Sh. avtomashinasini boshqarib, Samarqand viloyati Oqdaryo tumani “Oytamg‘ali” mahallasi hududidan o‘tgan M-37 avtomobil yo‘lida, tanishlari bilan avtomobil yo‘lini to‘sib, avtobusni harakatlanishiga yo‘l qo‘ymasdan, avtobusga shikast yetkazgan.
Hodisada hech kim jarohat olmagan.
Holat yuzasidan viloyat IIB tomonidan o‘rganish ishlari olib borilib, ushbu holatda ishtirok etgan barcha shaxslar aniqlanib, ushlangan.
Hozirda tergovga qadar tekshiruv harakatlari olib borilmoqda.
O‘rganishlar yakuni bilan ushbu holatda ishtirok etgan barcha shaxslarning harakatlariga huquqiy baho beriladi, deyiladi xabarda.
