“PSJ” darvozaboni Riko operatsiya qilindi
Ilgari u otdan yiqilib, 19 kun komada yotgandi.
“PSJ” darvozaboni Serxio Riko baxtsiz hodisa natijasida miyasida paydo bo‘lgan anevrizmani davolash uchun operatsiya qilindi. Bu haqda “Telecinco” nashri xabar berdi. Xabar qilinishicha, uni kasalxonaga yotqizish vaqtida Sevilyadagi shifoxonaning reanimatsiya shifokorlari Serxio Rikoda miya anevrizmasi borligini aniqlashgan va uning xavfliligi tufayli operatsiya qilishga qaror qilishgan. Operatsiya muvaffaqiyatli o‘tdi va taxminan bir soat davom etdi. Shifokorlarning so‘zlariga ko‘ra, hammasi yaxshi, futbolchi allaqachon o‘z palatasida dam olmoqda.
Avvalroq Riko otdan yiqilib, boshidan jarohat olgani xabar qilingandi. U Sevilyadagi kasalxonaga yotqizilgan va u yerda miyaga qon quyilishi tashxisi qo‘yilgan. Darvozabon 19 kunni komada o‘tkazdi va 20 kilogrammdan ortiq vazn yo‘qotdi.
