Farrosh Messidan dastxat olgani uchun ishdan bo‘shatildi
U "Inter Mayami"ning so‘nggi o‘yinida farroshlik qilgan.
"Inter Mayami" stadionida ishlagan farrosh Leo Messidan dastxat olgani uchun ishdan bo‘shatildi. Bir yarim yildan beri Mayamida istiqomat qilayotgan kolumbiyalik Kristian Salamanka "Inter Mayami" stadionidagi so‘nggi o‘yinda farrosh bo‘lib ishlagan. Salamanka - sport tadbirlari va konsertlar o‘tadigan maydonlarni tozalash bilan shug‘ullanadigan kompaniya xodimi. U Messini ko‘rib, undan dastxat so‘ragan va buning uchun uni ishdan bo‘shatishgan.
"Avtobuslar to‘xtab turgan sektordagi hojatxonalarni tozalashim kerak edi. Baxtimga, avtobus to‘xtab, barcha o‘yinchilar tushishganida men tashqarida edim. Oxirgisi Messi edi. Menga: "Hey, jahon chempioni"! deb baqirishim kifoya edi. Va u o‘girilib qaradi. Ishchi ko‘ylagimning tugmalarini yechdim, tagida Argentina futbolkasi bor edi. Shundan so‘ng u dastxat yozib berdi. Keyin xavfsizlik xodimlari paydo bo‘ldi, ular meni olib chiqib ketishdi va ishdan bo‘shatishdi", - dedi Kristian.
Qayd etilishicha, stadion ishchilari (klubda yoki tashqi kompaniyada ishlashidan qatʼi nazar) ish vaqtida yulduzlar bilan suratga tushmaslik va ularning dastxatlarini olmaslik haqida ogohlantirilgan.
