Toshkentda yo‘l o‘tkazgich ustunlari qulashi ortidan jinoyat ishi qo‘zg‘atildi
Hozirda 3 nafar mansabdor protsessual tartibda ushlangan.
Avvalroq Toshkent shahrining Yakkasaroy tumanida qurilayotgan yo‘l o‘tkazgichlarning 5 ta ustuni qulab tushgani xabar qilingandi. Holat yuzasidan Transport prokuraturasi qo‘shimcha maʼlumot berdi.
Qayd etilishicha, uzunligi 42 metrlik 5 dona yo‘l o‘tkazgich ustuni (balkalar) qulab tushgan va 2 mlrd 760 mln so‘mlik zarar yetkazilgan.
Mazkur holat yuzasidan Transport prokuraturasi tomonidan Jinoyat kodeksining tegishli moddalari bilan jinoyat ishi qo‘zg‘atilib, 3 nafar mansabdor shaxslar gumon qilinuvchi tariqasida ishga jalb qilinib, protsessual tartibda ushlangan.
Hozirda jinoyat ishi yuzasidan dastlabki tergov harakatlari olib borilmoqda.
