Hafta oxirigacha o‘rtacha issiq ob-havo bo‘lishi kutilmoqda
Gidrometeorologiya xizmatining xabar berishicha, ayrim hududlarga 25-avgustdan Volga bo‘yi hududlaridan salqin havo massasi tarqala boshlaydi.
"O'zgidromet" ma'lumotlariga ko'ra, 21-25-avgust kunlari O‘zbekiston hududining katta qismida havo kam bulutli bo‘ladi, yog‘ingarchilik kutilmaydi. Faqat bugun, 21-avgust kunduzi respublikaning shimoli-g‘arbiy hududlarida ba’zi joylarda va 22-24-avgust kunlari ayrim tog‘li hududlarda qisqa muddatli yomg‘ir yog‘ishi, momaqaldiroq bo‘lishi mumkin.
Havo harorati asosan kechalari 18-23 daraja, kunduzi 21-avgustda 34-39 daraja, 22-23 avgustda 32-37 daraja, 24-25 avgustda esa 34-39 daraja bo‘ladi.
Qayd etilishicha, O‘zbekistonning shimoli-g‘arbiy hududlariga 25-avgust kuni Volga bo‘yi hududlaridan salqin havo massasi tarqala boshlaydi. Natijada Qoraqalpog‘iston Respublikasi va Xorazm viloyatida kunduzgi harorat 30-35 darajagacha pasayadi.
Shuningdek, 20-avgustda shimolda va cho‘l hududlarda ba’zi joylarda shamol tezligi 15-20 metr/sekundgacha kuchayishi, ayrim joylarda chang-to‘zon bilan kuzatilishi mumkin.
