O'zbekistonda sentyabr-noyabr oylarida kutilayotgan ob-havo ma'lumotlari e'lon qilindi
Gidrometeorologiya xizmati O'zbekiston bo'yicha kuz mavsumi uchun prognozlarini e'lon qildi.
"O'zgidromet" 2023-yilning sentyabr-noyabr oylarida kutilayotgan ob-havo ma'lumotlari prognozini e'lon qildi.
Unga ko'ra, sentyabr oyida o'rtacha oylik havo harorati respublika bo‘yicha me’yor atrofida, ba’zi joylarda me’yordan 1-1,5 darajaga yuqori bo‘lib, 18-25 darajani tashkil etadi. Oyning birinchi yarmida harorat asosan kechalari 13-18 daraja, kunduz kunlari 33-38 daraja bo‘ladi. Oyning ikkinchi yarmida harorat kechalari 13-18 darajadan 8-13 darajagacha, kunduz kunlari 30-35 darajadan 23-28 darajagacha o‘zgarib turadi.
Ushbu oyda oylik yog‘ingarchilik miqdori me’yordan kam, ba’zi joylarda odatiy me’yor atrofida bo‘lishi kutilmoqda. Sentyabr oyining ikkinchi va uchinchi o‘n kunligining ayrim kunlarida biroz yomg‘ir yog‘ishi mumkin, janubda esa yomg‘ir yog‘ish ehtimoli kam.
Oktyabr oyida o‘rtacha oylik havo harorati respublika bo‘yicha me’yor atrofida bo‘lib, 10-12 darajani, janubda 16-18 darajani tashkil etadi. Oy davomida harorat kechalari 10-15 daraja iliqdan 3-8 darajagacha o‘zgarib turadi, oy oxirida 0-2 darajagacha sovuq bo‘lishi mumkin, kunduz kunlari 23-28 daraja iliqdan 13-18 darajagacha o‘zgarib turadi.
Shimoliy hududlarda, oy davomida havo harorati kechalari 8-13 daraja iliqdan 1-6 darajagacha o‘zgarib turadi. Shuningdek, ba'zi kunlari harorat 0-3 darajagacha sovuq bo‘lishi mumkin, kunduz kunlari 12-17 daraja iliqdan 20-25 darajagacha o‘zgarib turadi.
Oylik yog‘ingarchilik miqdori me’yor atrofida, ba’zi joylarda me’yordan ko‘p, shimolda va janubda ba’zi joylarda me’yordan kam bo'lishi kutilmoqda. Oyning ikkinchi va uchinchi o‘n kunliklarida asosan yomg‘ir ko‘rinishidagi yog‘ingarchilik bo‘lishi kutilmoqda.
Noyabr oyida o‘rtacha oylik havo harorati o‘rtacha ko‘p yillik qiymatlarga yaqin bo‘lib, 2-8 daraja iliqni, janubda esa 10 darajagacha iliq bo'ladi.
Ushbu oyda O‘zbekiston hududining katta qismida yog‘ingarchilik me’yorga yaqin bo‘lishi prognoz qilinmoqda, faqat respublikaning janubi-g‘arbida biroz ehtimollik bilan yog‘ingarchilik taqchilligi bo‘lishi kutilmoqda.
