Toshkentda bepul avtobus yo'nalishi yo'lga qo'yildi
Toshkent metropolitening Yunusobod yo’nalishidagi ayrim bekatlarning vaqtinchalik yopilishi sababli tashkil etilayotgan mazkur yo'nalishdagi avtobuslar har kuni soat 05:00 dan 00:00 ga qadar 3 daqiqalik interval bilan harakatlanadi.
“Toshshahartransxizmat”ning ma'lum qilishicha, 26-avgustdan boshlab metropoliten yo'nalishining "Yunusobod" va "Turkiston" stansiyalari ishga tushirilgunga qadar 2m-sonli “Yunusobod 12-dahasi – Shaxriston metrosi” oralig’ida vaqtinchalik xizmat ko’rsatuvchi bepul metrobus yo’nalishi tashkil etilmoqda.
Mazkur tashkil etilayotgan vaqtinchalik metrobus yo'nalishidagi harakat jadvallari soni "King Long" rusumli 10 ta avtobuslar asosida tashkil etiladi.
Qayd etilishicha, yo'nalishning ish tartibi 3 daqiqalik oraliq interval bilan soat 05:00 dan 00:00 ga qadar etib belgilangan. Yo'nalish Yunusobod mavzesi 12-daha bekatidan Yunusobod, "Turkiston" va "Shaxriston" metro bekatlari orqali to'xtab harakatlanadi.
Eslatib o'tamiz, avvalroq 26-avgust kunidan boshlab Toshkent metropoliteni “Yunusobod” yo‘nalishining “Yunusobod” va “Turkiston” bekatlari rejali profilaktik ishlar sababli 4 oy muddatga yopilishi haqida xabar berilgandi.
