"Rossiyaning O‘zbekistonda maktab qurish taklifi noto‘g‘ri talqin qilinmoqda"

 

Avval xabar qilinganidek, joriy yilning 18-sentabr kuni Moskva shahrida O‘zbekiston Respublikasi va Rossiya Federatsiyasi hukumat rahbarlari darajasidagi Qo‘shma komissiyaning 4-majlisi bo‘lib o‘tdi.

 

Maʼlumotlarga ko‘ra, Moskva shahrida O‘zbekiston Respublikasi va Rossiya Federatsiyasi hukumat rahbarlari darajasidagi Qo‘shma komissiyaning 4-majlisida madaniy-gumanitar yo‘nalishdagi hamkorlik bo‘yicha bildirilgan muayyan taklif mohiyati noto‘g‘ri talqin qilinmoqda. Bosh vazir matbuot kotibi Bekzod Hidoyatov mazkur holatga munosabat bildirdi.

 

Unga ko‘ra, davlatlar o‘rtasidagi o‘zaro rasmiy kelishuvlarga asosan, bir davlat hisobidan boshqa davlat hududida maktab va shunga o‘xshash ijtimoiy obyektlar qurish anʼanasi jahon tajribasida mavjud. Bu o‘zaro ijtimoiy yordam sifatida tasniflanadi.

 

“Shuni alohida qayd etish lozimki, xorijiy mamlakatlar tomonidan qurib beriladigan maktablarning taʼlim dasturlari dastlab soha mutaxassislari tomonidan milliy urf-odat, qadriyat va anʼanalarimiz, tariximiz, amaldagi qonun hujjatlarimiz, mavjud taʼlim standartlarimiz nuqtai nazaridan chuqur o‘rganib chiqiladi. Agar qurib berilishi taklif etilayotgan maktab va uning dasturi yuqorida nazarda tutilgan talablarga mazmunan mos kelsa, ushbu taʼlim muassasasining faoliyat yuritishi uchun o‘rnatilgan tartibda litsenziya beriladi.

 

Mazkur jihatlarni inobatga olgan holda, ijtimoiy tarmoq foydalanuvchilaridan asoslanmagan maʼlumotlarni tarqatmasliklarini so‘rab qolamiz”, — deyiladi xabarda.