Metropoliten yo‘lovchilarga murojaat bilan chiqdi
Poyezdlarning buzilishiga sabab nima?
Metro vagonlariga belgilangan yo‘lovchilar sonining 2 marta ko‘payishi hisobiga vagonlarga normadan ortiq yuklama tushib, poyezdlarning tez-tez buzilishiga olib kelmoqda.
Shularni hisobga olib, metropoliten ma’muriyati yo‘lovchilardan “tig‘iz vaqtlarda to‘la vagonlariga chiqmasdan, keyingi bo‘shroq metro vagonlarga chiqishlarini” so'ragan.
Ma’lum qilishlaricha, bugungi kunda metropoliten yo‘lovchilariga 6 ta harakat tarkibi 5 ta vagondan tashkil topgan holda xizmat ko‘rsatib kelmoqda, ularning soni shu yilning oxiriga qadar 13 taga yetkaziladi.
Bundan tashqari, joriy yil yakuniga qadar 56 ta va 2024 yil davomida yana qo‘shimcha 104 dona zamonaviy metro vagonlarini xarid qilish ko‘zda tutilgan.
Yangi metro vagonlari kelishiga 2 oy qolgan. Ular kelishi bilan Chilonzor, O‘zbekiston, Yunusobod va Yer usti halqa yo‘li yo‘nalishida vagonlar soni ortadi hamda buning hisobiga oraliq interval yanada kamaytiriladi.
