Noyer 11 oylik tanaffusdan so‘ng maydonga qaytishga yaqin
U shu hafta safga qaytishi mumkin.
Darvozabon o‘tgan yilning dekabr oyida jarohatlangandi. "Bavariya" klubi va Germaniya milliy jamoasi a’zosi 2022-yil 1-dekabrdan buyon maydonga tushmayapti.
Jurnalist Georg Holsnerning xabar berishicha, Myunxen klubi shifokorlari 37 yoshli posbonning maydonga qaytishiga ruxsat berishgan.
Endi qaytish sanasini jamoa bosh murabbiyi Tomas Tuxel va Noyerning o‘zi aniqlashadi. Darvozabon 21-oktabr kuni bo‘lib o‘tadigan "Mayns" bilan o‘yinda ishtirok etishi ehtimoli bor.
