O‘zbekistonga import qilingan elektr jihozlarining sertifikatlari qayta tekshiriladi

Bosh vazir o‘rinbosari Jamshid Xo‘jayev boshchiligidagi hukumat komissiyasi Qozog‘istondan O‘zbekistonga olib kirilayotgan “shubhali” elektrotexnika mahsulotlarining kelib chiqish sertifikatlarini (ST-1) tekshirish bo‘yicha tegishli tashkilotlarga topshiriq bergan. Bu 2023 yilning 25 dekabridagi 118-sonli komissiya bayonnomasida ko‘zda tutilgan. 

 

Gap 2021-2022 yillarda Qozog‘istondan olib kelingan elektr jihozlari haqida bormoqda. Investitsiyalar, sanoat va savdo vazirligi, “O‘zbekekspertiza” kompaniyasi va Bojxona qo‘mitasi sertifikatlarni tekshirib, “aniqlangan holatlarni bartaraf etish bo‘yicha Vazirlar Mahkamasiga takliflar kiritishi” zarur.

 

Nashrning hukumatdagi manbasiga ko‘ra, rasmiylar Qozog‘istondan elektr jihozlari importi ko‘payganidan xavotirda va ushbu mahsulotlar aslida Xitoy tomonidan yetkazib berilayotganidan gumon qilmoqda.

 

Xususan, xitoylik yetkazib beruvchilar MDH davlatlari o‘rtasidagi erkin savdo to‘g‘risidagi shartnomaga asosan Qozog‘istonda minimal mahalliylashtirish bilan elektr jihozlarini (konditsionerlar, muzlatkichlar v.b.) yig‘ib, O‘zbekiston bozoriga bojsiz yetkazib berishadi, deb gumon qilinyapti.

 

Bundan tashqari, bayonnomada bir oy muddatda sovitish tizimlari (fankoyl agregatlari, chillerlar v.b.), gaz qozonlari, quyosh suv isitkichlari va Toshkent shahridagi Texnopark korxonasida ishlab chiqarilgan “aqlli” gaz hisoblagichlarining kelib chiqish sertifikatlarini (S-1) belgilangan tartibda rasmiylashtirish choralarini ko‘rish topshirilgan.