Nosozliklar ham odatga aylandi: metroning "Amir Temur xiyoboni" bekatida yana poyezd to‘xtab qoldi
“Toshkent metropoliteni” doimgidek uzr so‘rash bilan kifoyalandi.
Ijtimoiy tarmoqlarda "Amir Temur xiyoboni bekatida poyezd ishlamay qoldi" mazmunidagi xabarlar tarqaldi. Bu haqda "Toshkent metropoliteni" DUK maʼlumot berdi.
Qayd etilishicha, 2024-yilning 7-fevral kuni soat 08:55 larda Chilonzor yo‘nalishining "Hamid Olimjon — Amir Temur xiyoboni" peregonida harakatlanayotgan 10-sonli harakat tarkibida texnik nosozlik holati kuzatilgan. Buning oqibatida, ushbu harakat tarkibi 3 daqiqa vaqt davomida harakatlana olmagan. Shu sababli ortdan kelayotgan 4-sonli harakat tarkibi bilan tirkamaga olingan holda harakat tarkibi tekshiruv yo‘lagi tomon yuborilgan.
"Hozirgi vaqtda yo‘nalishda poyezdlar harakati belgilangan jadval asosida amalga oshirilmoqda. Keltirilgan noqulayliklar yuzasidan yo‘lovchilardan uzr so‘raymiz", — deyiladi munosabatda.
Bu metrodagi nosozliklarning birinchisi emas: 17 yanvar kuni “Kosmonavtlar” metro bekatiga kirib kelgan harakat tarkibining vagon elektr qismida texnik nosozlik holati kuzatilib, kichik yong‘in chiqqandi.
15-yanvarda “Do‘stlik” bekatidan harakatlanayotgan poyezdning 4-vagonidagi elektr bilan taʼminlovchi himoya avtomatida texnik nosozlik kuzatilib, vagonning asosiy yoritish chiroqlari o‘chib qolgandi.
7-yanvarda esa “Yunus Rajabiy” bekatidan harakatlanishi lozim bo‘lgan poyezd vagonlaridan biri tutab ketgan.
