Sirdaryo hokimligi radarlar uchun yana pul ajratmoqda
Viloyat hokimining pul ajratish bo‘yicha uch farmoyishi e’lon qilindi.
2023 yil Guliston shahrida o‘tkazilgan Xalqaro baxshichilik festivali xarajatlarini qoplash uchun viloyat mahalliy byudjeti hisobidan 1 milliard so‘m berilishi ma’lum qilingan.
Sirdaryo viloyati hokimi Akmaljon Mahmudaliyevning 1 mart kuni pul ajratish bo‘yicha uch farmoyishi e’lon qilindi. Pullar festival, turli tadbirlar va radarlar xarajatiga sarflanadi.
Birinchi hujjatga ko'ra, 2023 yil 6-8 may kunlari Guliston shahrida o‘tkazilgan Xalqaro baxshichilik festivali xarajatlarini qoplash uchun viloyat mahalliy byudjetining erkin qoldiq mablag‘lari hisobidan bir milliard so‘m berilishi ma’lum qilingan. Pullar Madaniyat vazirligi huzuridagi "Xalqaro festivallar direksiyasi"ga beriladi.
Tuman(shahar)larda fuqarolar tashabbusini shakllantiruvchi tadbirlarni moliyalashtirish uchun mahalliy byudjetning erkin qoldiq mablag‘laridan 5 mlrd. so‘m beriladi. Pullar Sirdaryo viloyatining 11 tumaniga taqsimlanadi. Jumladan, Guliston shahriga 502 million, Shirin shahriga 146 million so‘m, Boyovut tumaniga 816 million so‘m, Sirdaryo shahriga 795 million so‘m ajratiladi.
Uchinchi farmoyishga ko‘ra, viloyatda yo‘l qoidalari buzilishini maxsus qayd etuvchi foto va video dasturiy-texnik vositalarni xarid qilish xarajatlari uchun 3 mlrd. so‘m beriladi.
Sirdaryo hokimi bir kun avval ham mablag‘ ajratish bo‘yicha uchta farmoyish chiqargandi.
