Sirdaryodagi avtomobil bozori hozircha hech qayerga ko‘chirilmaydi
Bu haqda viloyat hokimligi axborot xizmati maʼlum qildi.
Avvalroq Sirdaryoning Mirzaobod tumanidagi avtomobil bozori boshqa joyga ko‘chirilib, uning o‘rniga “dom” qurilishi xabar qilingandi. Ammo bozorga aylantirilishi kerak bo‘lgan yangi hudud talabga javob bermagani aniqlanib, bozorni ko‘chirish ishlari kechiktirildi.
Unga ko‘ra, tumanning “Navro‘z” mahallasida joylashgan haftaning faqatgina har shanbasida faoliyat yurituvchi avtomobil bozorini boshqa hududga ko‘chirish rejalashtirilgan. Uning o‘rnida 6 ta arzonlashtirilgan ko‘p qavatli uy-joy quriladi.
Tuman hokimligi, avtobozor shu haftadan xalqaro ahamiyatdagi A-373 "m-39 avtoyo‘li – Guliston – Bo‘ka – Angren – Qo‘qon va Andijon orqali O‘sh" avtomobil yo‘lining 15 kilometridagi "Anor sotish va aholiga boshqa maishiy xizmatlar ko‘rsatish majmuasi" hududida ish boshlashini maʼlum qildi.
Ammo viloyat hokimligi axborot xizmati bozorga aylantirilishi kerak bo‘lgan yangi hudud talabga javob bermaganligi bois bozorni ko‘chirish ishlari kechiktirilganini eʼlon qildi.
Keltirilishicha, hududni tartibga keltirish lozim. Bu esa o‘z o‘rnida vaqt talab etadi. Aniq muddatlar maʼlum bo‘lishi bilan bu borada qo‘shimcha axborot beriladi.
