Turkiyaning “Dörtyol” terminali Rossiya nefti bilan operatsiyalarni to‘xtatdi
G‘arb sanksiyalari kiritilgandan keyin Turkiya Rossiya neftining eng yirik importchilaridan biriga aylandi. Biroq AQSH bosimi tufayli Rossiya neftini qabul qilish va yuklashni rad etish to‘g‘risida qaror qabul qilindi.
Terminalni boshqarayotgan kompaniya fevral oyi oxirida mijozlarga Rossiya nefti bilan bog‘liq barcha operatsiyalarni to‘xtatayotgani va qonunlar buzilmagan taqdirda ham Rossiyadan yuklarni qabul qilmasligi haqida xabar bergan edi.
2023 yil oxirida “Dörtyol” terminali 11,74 million barrel Rossiya neftini qabul qilgan, bu 2021 yildagi barcha yuk jo‘natuvlarining umumiy hajmidan yetti baravar ko‘p demakdir.
Kpler tahliliy kompaniyasi maʼlumotlariga ko‘ra, Rossiyaning so‘nggi tankeri 19 fevral kuni “Dörtyol” terminaliga 511 ming barrel dizel yoqilg‘isi yetkazib bergan. Shu bilan birga, “Dörtyol” taqiq joriy etilgunga qadar deklaratsiya qilingan Rossiya yuklarini qabul qilishni davom ettiradi, deya aniqlik kiritmoqda kompaniya.
