Rossiyada uch yoshli bola paratsetamol ichib vafot etdi
Bolaning ota-onasi u shamollaganda shu dorini ichirgan.
Moskvada Buryatiyadan jigar transplantatsiyasi uchun kelgan uch yoshli bola paratsetamolning haddan tashqari dozasi tufayli vafot etdi.
Maʼlum bo‘lishicha, bola shamollaganda uning ota-onasi paratsetamol berib, jigariga jiddiy zarar yetkazgan.
Shundan so‘ng u Transplantologiya va sunʼiy organlar milliy tibbiy ilmiy markaziga jigar ko‘chirib o‘tkazish operatsiyasi uchun yuborilgan.
“Bola jigar transplantatsiyasiga tayyor edi, ammo uning tanasi bunga bardosh bera olmadi. Shifokorlar bolaning hayotini saqlab qolish uchun barcha imkoniyatlarni ishga solishdi”, — deyiladi Sog‘liqni saqlash vazirligi xabarida.
Sog‘liqni saqlash vazirligi dori vositalarini qo‘llashdan oldin shifokor bilan maslahatlashish zarurligini eslatdi.
"Har qanday dorining organizmga taʼsiri bevosita ishlatiladigan dozaga, yaʼni organizmdagi faol moddaning kontsentratsiyasiga bog‘liq. Hech qanday holatda uni oshirib yubormaslik kerak, chunki bu sog‘liq uchun tuzatib bo‘lmaydigan zarar yetkazishi mumkin ", deyiladi xabarda.
