38 jamoa orasida ikkinchi o'rin
Paradzyudochilarimiz Antaliya Gran-Prisida muvaffaqiyatli ishtirok etishdi.
1-2 aprel kunlari Turkiyada paradzyudo bo‘yicha Antaliya Gran-Prisi o‘tkazildi. Xalqaro turnirda dunyoning 38 mamlakatidan 200 dan ziyod polvonlar o‘z vazn toifalarida g‘oliblik uchun tatamiga tushishdi.
Parasportchilar uchun muhim reyting ochkolarini beruvchi mazkur turnirning dastlabki kunida J2 klassida 60 kg vaznda Sherzod Namozov va 73 kgda Uchqun Quronboyevlar barcha raqiblarini imkoniyatsiz qoldirib shohsupaning yuqori pog‘onasiga ko‘tarildi.
Navbatdagi kun bellashuvlari ham vakillarimiz uchun omadli o‘tdi. Jumladan 90 kggacha bo‘lgan vazn toifasida Daurxon Karomatov navbatdagi oltin medalni jamoa hisobiga qo‘shib qo‘ygan bo‘lsa yana bir polvonimiz 90 kgdan og‘ir vazndagi sportchilar o‘rtasida Alovuddi Jo‘raqulov bronza medaliga ega chiqdi.
Xalqaro turnir yakunlariga ko‘ra umumjamoa hisobida, 38 mamlakat vakillari orasida paradzyudochilarimiz Chin o‘lkasi vakillaridan keyin ikkinchi pog‘onani band etdi. Kuchli uchlikni Braziliya jamoasi yakunlab berdi.
