Ekvadorda to‘dalar zo‘ravonligiga qarshi kurash bo‘yicha referendum o‘tkazildi
Prezident Daniel Noboa mamlakatda kuchayib borayotgan zo‘ravonlik bilan kurashib, rejalashtirilgan xavfsizlik choralari uchun saylovchilarning qo‘llab-quvvatlashiga umid qilmoqda.
21 aprel kuni bo‘lib o‘tgan ommaviy ovoz berishda armiya va politsiya vakolatlarini kengaytirish, qurol nazoratini kuchaytirish va uyushgan guruhlar jinoyatlari uchun jazoni qatʼiylashtirish bo‘yicha qarorlar qabul qilindi.
Ekvador prezidenti Daniel Noboa ekvadorliklarni politsiya-harbiy patrul xizmatini joriy etish, qidiruvdagi jinoyatchilarni ekstraditsiya qilish, terrorizm va qotillik uchun jazo muddatini uzaytirishni qo‘llab-quvvatlashga chaqirdi. Referendumga jami 11 ta masala qo‘yildi.
Yanvar oyida kuchli “Los Choneros” to‘dasi rahbari, narkobaron Adolfo Macias qamoqdan qochib ketganidan so‘ng, Noboa “ichki qurolli mojaro” tufayli favqulodda holat va komendantlik soati eʼlon qildi.
Ekvadorda banditizm kuchayishi munosabati bilan prezident Noboa barcha to‘dalarni yo‘q qilishni buyurdi. Farmon bilan u qurolli kuchlarga “ichki qurolli mojaro” rejimini eʼlon qilib, yigirma jinoiy tashkilotga qarshi operatsiyalar o‘tkazishni topshirdi. Farmonda Ekvadorda faoliyat yuritayotgan jinoiy to‘dalar yo‘q qilinishi lozim bo‘lgan terrorchi tashkilotlar va urushayotgan nodavlat tomonlar deb ataladi. Bunga javoban jinoiy guruhlar hukumatga “urush” eʼlon qildi. O‘shandan beri qamoqxonalarda zo‘ravonlik avj oldi, mahbuslar tartibsizliklar uyushtirdi va xodimlarni garovga oldi. Bundan tashqari, Ekvadorda qurolli hujumlar va odam o‘g‘irlashlar soni keskin ortdi.
