Tailanddagi qotillik: xalqaro qidiruvdagi o‘zbekistonlik erkak AQSHda qo‘lga olindi
Hozirda erkak deportatsiya jarayonini kutib, ICE hibsxonasida saqlanmoqda.
Tailandda qiz do‘stini o‘ldirganlikda ayblanib xalqaro qidiruvda bo‘lgan 35 yoshli O‘zbekiston fuqarosi AQShning Nyu-York shahrida qo‘lga olindi. U Bruklindagi uyi yaqinida AQSh Immigratsiya va bojxona nazorati (ICE) xodimlari tomonidan hibsga olingan.
ICE ma’lumotlariga ko‘ra, 2013-yilda Tailandda hibsga olingan erkak qiz do‘stini o‘ldirganini tan olgan. Shundan so‘ng u ayolning jasadini chamadonga solib, kanalga tashlab yuborgan.
Shuningdek, erkak 2020-yilda O‘zbekistonda o‘g‘rilikda ayblanib, besh yilga ozodlikdan mahrum etilgan. AQShda esa Nyu-York shahar politsiyasi tomonidan ta’qib qilish holati yuzasidan olib borilgan tergovga ham aloqador bo‘lgan. 2024-yilda Kings okrugi sudi unga nisbatan himoya orderi chiqargan.
AQSh chegara xizmati uni ilk bor 2023-yil aprel oyida Arizona shtatining Lyukvill shahri yaqinida chegarani noqonuniy kesib o‘tganidan keyin qo‘lga olgan. U o‘sha vaqtda 110 nafar migrantdan iborat guruh tarkibida bo‘lgan.
Hibsga olinganidan so‘ng u Nyu-Yorkda immigratsiya bo‘yicha sud eshituvida qatnashish sharti bilan garov evaziga qo‘yib yuborilgan. Biroq erkak 2024-yil may oyida ro‘yxatdan o‘tish uchun bir marta kelganidan keyin immigratsiya idoralariga hisobot berishni to‘xtatgan.
2026-yil 14-oktabr kuni ICE xodimlari uni Bruklindagi uyi yaqinida qayta qo‘lga olgan. Hozirda Sobirov deportatsiya jarayonini kutib, ICE hibsxonasida saqlanmoqda.
