Toshkentda “Teach for Uzbekistan” tashkilotining rasmiy taqdimoti bo‘lib o‘tdi
Ushbu loyiha O‘zbekiston bolalarining barchasiga sifatli ta’lim olish imkoniyatini ta’minlash maqsadida yo‘lga qo‘yilmoqda.
21-aprel kuni Oʻzbekiston Tasviriy san’at galereyasida “Teach for Uzbekistan” vasiylik kengashi a’zolari – Nozima Davletova, Zafar Hoshimov va jamoa a’zolari ishtirokida “Teach for Uzbekistan” tashkilotining rasmiy taqdimot marosimi bo‘lib o‘tdi.
Nozima Davletova ta’lim sohasidagi islohotlarning dolzarbligi, bunday islohotlar natijalari uzoqroq vaqt davomida ko‘rinishi va bunda jamiyat, o‘qituvchilar va davlat tomonidan birgalikdagi sa’y-harakatlargina natijaga olib kelishi mumkinligi haqida, shuningdek, “Teach for Uzbekistan” loyihasining o‘qituvchilik kasbi maqomini oshirish va maktab ta’limiga ilg‘or yetakchilarni jalb qilish orqali o‘quvchilar va maktablarga katta manfaat olib kelishi haqida gapirdi.
Zafar Hoshimov o‘qituvchilik kasbi va uning jamiyatdagi muhim o‘rni, o‘qituvchilik tajribasining yoshlarning kelgusi ish faoliyati va shaxsiy rivojlanishdagi katta manfaatini o‘z tajribalari asosida so‘zlab berdi.
Tashkilot ta’sischisi va direktori – Umida Yo‘ldosheva ijtimoiy loyihalardagi tajribalari, o‘qituvchilarning yoshlarga ko‘rsatadigan ijobiy ta’siri, ta’lim va aynan “Teach for Uzbekistan” loyihasining dolzarbligi, loyiha mazmuni va qisqa muddat ichidagi natijalari haqida gapirdi.
Ma'lumot uchun, “Teach for Uzbekistan” – bu yuqori malakali o‘qituvchilar yetishmovchiligi bor bo‘lgan viloyat maktablarida ishlash uchun eng yaxshi mahalliy va xorijiy OTMlar bitiruvchilari va yosh iqtidorli nopedagog mutaxassislarni jalb qilishga qaratilgan noyob tashabbusdir. Ushbu loyiha yangi avlod pedagoglarini ilhomlantirish va ularni ta’limni rivojlantirishga hissa qo‘shishga, shuningdek, O‘zbekiston bolalarining barchasiga sifatli ta’lim olish imkoniyatini ta’minlashga undash uchun yo‘lga qo‘yildi.
