Buxoroda jadidlar merosi davlat muzeyi tashkil etiladi
"Jadidlar merosi davlat muzeyini tashkil etish to‘g‘risida"gi prezident qarori imzolandi.
Qarorga ko‘ra, Buxoro shahridagi tarixiy maskan – Xo‘ja Gulrez ko‘chasi 13-uy manzilida joylashgan Hovli Poyon majmuasida Jadidlar merosi davlat muzeyi tashkil etiladi.
Muzey faoliyatining asosiy vazifalari:
— jadidlik harakatiga oid mamlakatimiz va xorijdagi turli manbalar va tarixiy hujjatlarni aniqlash, to‘plash, saqlash, o‘rganish, tiklash, nusxalash, eʼlon qilish, ular asosida Muzey fondini boyitib borish va ekspozitsiyalarni yaratish, shuningdek, madaniy-maʼrifiy va ilmiy-tadqiqot faoliyatini amalga oshirish;
— maʼrifatparvar jadidlarning Vatanimiz va jahon tarixidagi muhim o‘rni va ahamiyatini, milliy istiqlolimizning maʼnaviy asoslarini yaratishdagi hissasi va fidoyiliklarini haqqoniy yoritish, aholi, ayniqsa, yoshlar o‘rtasida keng targ‘ib qilish;
— muzey ekspozitsiyalarini yaratishda zamonaviy axborot texnologiyalaridan keng foydalanish, xalqaro hamkorlikni yo‘lga qo‘yish va mustahkamlash.
Muzey Madaniyat va sanʼatni rivojlantirish jamg‘armasi tizimiga kiradi hamda faoliyati binosida qurilish-montaj ishlari yakunlanganidan so‘ng boshlanadi.
Muzeyni saqlash xarajatlari – Buxoro viloyati mahalliy byudjeti mablag‘lari, Muzeyning o‘z daromadlari va qonunchilik hujjatlari bilan taqiqlanmagan boshqa manbalar hisobidan qoplanadi.
Muzey jadidlik harakatiga oid ashyolar va kolleksiyalar bilan to‘ldirib boriladi.
