Samarqandda MCHJ rahbari 1 mlrd kreditni “uxlatdi”
Hozirda holat yuzasidan jinoiy ish ochilgan.
Samarqand va Sirdaryo viloyatlarida kredit mablag‘larini o‘zlashtirish holatlari aniqlandi. Bu haqida Bosh proukuratura huzuridagi Iqtisodiy jinoyatlarga qarshi kurashish departamenti xabar bermoqda.
Qayd etilishicha, Oqdaryo tumanida faoliyat yurituvchi “M.B.” MCHJ rahbari O.Sh. hududiy tijorat banki filialidan ajratilgan 1 mlrd so‘m imtiyozli kredit evaziga xarid qilingan maishiy texnika vositalari va yumshoq mebellarni naqd pulga sotib yuborib, 850 mln so‘mni o‘zlashtirish yo‘li bilan talon-toroj qilgan.
Shuningdek, Boyovut tumanida “B-M.” MCHJ masʼul shaxslari va boshqalar maktabgacha taʼlim muassasasini rekonstruksiya qilish uchun tijorat banki filialidan ajratilgan imtiyozli kredit mablag‘ining 549,6 mln so‘mini o‘zlashtirish yo‘li bilan talon-toroj qilganliklari aniqlangan.
Mazkur holatlar yuzasidan Jinoyat kodeksining 167-moddasi (o‘zlashtirish yoki rastrata yo‘li bilan talon-toroj qilish) bilan jinoyat ishlari qo‘zg‘atilib, tergov harakatlari o‘tkazilmoqda.
