Rossiyada YouTube tezligi 70 foizga sekinlashishi mumkin
Bu “Rossiyaga qarshi xosting siyosati” bilan izohlandi.
Davlat Dumasining Axborot siyosati qo‘mitasi rahbari Aleksandr Xinshteyn o‘zining Telegram-kanalida mamlakatda YouTube platformasi orqali maʼlumotlarni yuklash tezligi 70 foizga sekinlashishi mumkiligi haqida yozdi.
“Yaqin kunlarda YouTube‘ni kompyuterlarda foydalanganda yuklab olish tezligi 40 foizga, keyingi hafta oxiriga kelib esa 70 foizga pasaytirilishi mumkin. Bu chora hozircha mobil internet orqali foydalanishga taʼsir qilmaydi”, — deya maʼlum qildi u.
Uning yozishicha, videoxosting ishini sekinlashtirish rossiyalik foydalanuvchilarga emas, balki YouTube maʼmuriyatiga qarshi qaratilgan majburiy qadam bo‘lib, bu bilan Rossiya rasmiylari videoxosting ishiga taʼsir o‘tkazishga urinayotganini bilvosita tan oladi. Davlat Dumasi deputati YouTube‘ning Rossiyada cheklanishini “Rossiyaga qarshi xosting siyosati” bilan ham bog‘laydi.
Maʼlumot uchun, Rossiyada YouTube‘ning keng ko‘lamli sekinlashishi 12 iyulda boshlandi - keyin “Rostelekom” buni Google uskunalarining eskirishi bilan bog‘lagan edi.
