Chiroqchi tumani hokimi jazolandi
Hokimlik holat yuzasidan qo‘shimcha maʼlumot berdi.
Avvalroq Qashqadaryo viloyatining Chiroqchi tumani hokimi Fayzulla Yusupov fuqaroga qo‘l ko‘targani xabar qilingandi.
Videolavhada ko‘rinishicha, hokim IIB xodimlari gaplashib turgan fuqaro oldiga kelgan va kutilmaganda uning yuziga tarsaki tortib yuborgan.
Viloyat hokimligi rasmiy munosabatiga ko‘ra, Fayzulla Yusupovga nisbatan intizomiy jazo chorasi qo‘llangan.
Shuningdek, tuman hokimi har bir fuqaro bilan xushmuomala va hurmat bilan munosabatda bo‘lishi, muloqot chog‘ida odob-axloq qoidalariga qatʼiy rioya qilishi uqtirilgan va kelgusida bu kabi holatlarga yo‘l qo‘ygan taqdirda tegishli javobgarlikka tortilishi to‘g‘risida qatʼiy ogohlantirilgan.
