O‘zbekistonda tadbirkorlar uchun faxriy unvon taʼsis etilmoqda
Yangi qonun loyihasi deputatlar tomonidan maʼqullandi.
Oliy Majlis Qonunchilik palatasining navbatdagi majlisida “O‘zbekiston Respublikasida xizmat ko‘rsatgan tadbirkor” faxriy unvonini taʼsis etish to‘g‘risida”gi qonun loyihasi ko‘rib chiqildi.
Qonun loyihasida turli sohalarda yuqori natijalarga erishib kelayotgan biznes vakillarini taqdirlash tizimini joriy etish maqsadida alohida davlat mukofotini taʼsis etish nazarda tutilmoqda.
Mazkur qonun loyihasi bilan “O‘zbekiston Respublikasida xizmat ko‘rsatgan tadbirkor” faxriy unvonini taʼsis etish va qonun hujjatlarida buning huquqiy asoslarini mustahkamlash, “O‘zbekiston Respublikasining faxriy unvonlarini taʼsis etish to‘g‘risida”gi va “Davlat mukofotlari to‘g‘risida”gi qonunlarga tegishli o‘zgartirish va qo‘shimchalar kiritish belgilanmoqda.
Deputatlarning taʼkidlashicha, qonun loyihasining qabul qilinishi yangi ish o‘rinlari yaratish, innovatsiyalar joriy qilish, eksport qilish va yetuk mutaxassislar tayyorlashda barchaga namuna bo‘ladigan hamda jamiyatimiz hayotining turli sohalarida yuqori natijalarga erishib kelayotgan biznes vakillarini tizimli taqdirlash imkonini beradi.
Shu bilan birga, ushbu unvonni taʼsis etish orqali tadbirkorlarning mamlakatimiz taraqqiyotiga qo‘shayotgan hissasiga eʼtiborni qaratish va baholash, katta yutuqlarga erishgan va jamiyatning IJtimoiy muammolarini hal etishda faol ishtirok etayotgan tadbirkorlarni aniqlash hamda ularni taqdirlash, aholini, ayniqsa, yoshlarni tadbirkorlikka keng jalb qilish va biznesga qiziqishni yuksaltirish maqsadiga erishiladi. Majlisda mazkur qonun loyihasi yuzasidan deputatlar o‘z fikr-mulohazalarini bildirib o‘tishdi.
