Gretsiyaning “oltin vizalari” qimmatladi
U mamlakatda 5 yil yashash uchun ruxsatnoma olish imkonini beradi.
1 sentyabrgacha Yevropa Ittifoqiga aʼzo bo‘lmagan mamlakatlar fuqarolari sarmoya evaziga Gretsiyada yashashga ruxsat olish uchun mamlakatda kamida 250 ming yevrolik ko‘chmas mulk sotib olishlari kerak edi. Endi Afina va Saloniki shaharlarida, shuningdek, Gretsiyaning yirik orollarida to‘lovning eng kam miqdor 800 ming yevroga ko‘tarildi. Mamlakatning boshqa hududlari bo‘ylab hozirda bu chegara 400 ming yevroni tashkil etmoqda.
2023 yilning mart oyida Portugaliya tomonidan “oltin vizalar” bekor qilingan edi. Bu davlatda ilgari 500 ming yevro va undan ko‘p sarmoya bilan yashash uchun ruxsatnoma olish mumkin edi. Lissabon bu qarorni boshqa jihatlar qatori, “oltin vizalar” oluvchilarning sarmoyasi ko‘pincha shubhali manbalardan kelishi bilan izohladi.
Gretsiyaning “Oltin viza”si uni olgan shaxs va uning bevosita qarindoshlariga mamlakatda 5 yil davomida yashash uchun ruxsatnoma olish, mulklarni ijaraga berish imkonini beradi.
