Andijondagi sport maktabida yong‘in yuz berdi
Hozirda yong‘in sodir bo‘lish sabablari aniqlanmoqda.
Ijtimoiy tarmoqlarda Andijon viloyatidagi Shahrixon sport maktabida yong‘in chiqqani haqida xabarlar tarqaldi. Viloyat FVB holat yuzasidan maʼlumot berdi.
Unga ko‘ra, 7 sentyabr kuni soat 09:40 da Shahrixon tumani, «Buvaydo» MFY, Chinobod ko‘chasida joylashgan BO‘SMning hozirda foydalanmay kelinayotgan yordamchi binosida yong‘in sodir bo‘layotgani haqida Andijon viloyati FVBga xabar kelib tushgan.
Soat 09:44 da aytilgan manzilga yong‘in qutqaruv ekipajlari yetib borgan va soat 09:46 da sodir bo‘lgan yong‘in batamom o‘chirilgan. Hodisa natijasida asosiy o‘quv binosidan alohida bo‘lgan yordamchi binoning jihozlari qisman yonib zararlangan. Ushbu bino foydalanishda bo‘lmagan.
Hodisa natijasida tan jarohati olish holatlari qayd etilmadi. Yong‘in sodir bo‘lish sabablari va moddiy zarar miqdori aniqlanmoqda.
