Mark Sukerbergning boyligi oxirgi 2 yilda olti barobarga oshdi
Facebook asoschisi Metaverse loyihasini ishga tushirganida o‘z kapitalining 100 milliard dollaridan ayrilishi mumkin edi.
Meta kompaniyasi asoschisi Mark Sukerbergning boyligi Metaverse loyihasi ishga tushirilganidan beri olti barobarga oshib, 201 milliard dollarga yetdi.
Bloomberg nashrining qayd etishicha, Sukerbergning shaxsiy boyligi birinchi marta 200 milliarddan oshgan. U dunyoning eng badavlat 500 insoni ro‘yxatida to‘rtinchi o‘rinni egallagan — Sukerbergdan yuqori pog‘onalarda Tesla va SpaceX asoschisi Ilon Mask, Amazon asoschisi Jeff Bezon va LVHM guruhi egasi Bernar Arno joylashgan.
Biznesmenning boyligi asosan Meta Platforms Inc. aksiyalarining rekord darajadagi narxi sabab oshgan. Buning natijasida Sukerbergga tegishli aktivlarning sof qiymati 2 yildan kamroq vaqt ichida qariyb olti barobar oshgan.
Yil boshidan beri Meta Platforms Inc. aksiyalarining qiymati o‘tgan yilga nisbatan 60 foizga o‘sgan. 28 sentyabr kuni har bir qimmatli qog‘oz 568,95 dollardan sotilgan.
Sukerberg Meta Platforms Inc.ning13 foiziga egalik qiladi, shu sababli 1 yanvardan boshlab uning boyligi 73,4 milliard dollarga oshgan.
Nashrning eslatishicha, Sukerbergning Metaverse‘ni yaratish va barcha mahsulotlarini unda birlashtirish g‘oyasi aksiyalar qiymatining keskin tushib ketishiga sabab bo‘lgan. O‘shanda Sukerberg o‘z kapitalining 100 milliard dollaridan ayrilishi mumkin edi.
Facebook ijtimoiy tarmog‘i bazasida metaolamning yaratilishi to‘g‘risida 2021 yilning iyulida eʼlon qilingan. O‘sha yilning oktyabrida ushbu ijtimoiy tarmoq, Instagram, WhatsApp va boshqa servislarga egalik qiluvchi Facebook Inc. korporatsiyasi o‘z nomini Meta‘ga o‘zgartirgan edi.
Avvalroq amerikalik tadbirkor, SpaceX va Tesla asoschisi Ilon Mask 2027 yilga borib dunyodagi birinchi trillionerga aylanishi mumkinligi to‘g‘risida xabar berilgandi. Tadqiqotchilar Maskning boyligi har yili o‘rtacha 110 foizga oshayotganini hisobga olgan.
