Tramp Putinga qo‘ng‘iroq qilib, Ukrainadagi urushni muhokama qildi
Amerika yetakchisi Kremlni Ukrainada vaziyatni keskinlashtirmaslikka chaqirdi va Yevropadagi AQSH qo‘shinlari haqida eslatdi.
"7 noyabr kuni bo‘lib o‘tgan suhbat chog‘ida AQSHning yangi saylangan prezidenti Putin bilan Rossiya-Ukraina urushini tezroq tugatishni muhokama qilgan. Donald Tramp Vashingtonning “Yevropadagi muhim harbiy ishtirokini” eslatib, Rossiya prezidentini keskinlashuvdan saqlanishga chaqirgan", — deb yozadi The Washington Post nashri o‘z manbalariga tayanib.
WP suhbatdoshlari, shuningdek, Tramp kelishuvning Rossiya bosib olingan hududlarning bir qismi ustidan nazoratni saqlab qolishi haqidagi versiyasini qo‘llab-quvvatlashini "shaxsiy fikri sifatida ko‘rsatganini" bildirishgan.
"Ukraina hukumati Tramp va Putin o‘rtasidagi suhbat haqida ogohlantirilgan va Kiyev bunga eʼtiroz bildirmagan", — deb yozadi nashr. Reuters xabariga ko‘ra, ushbu telefon muloqotidan bir kun oldin Tramp Ukraina prezidenti Vladimir Zelenskiy bilan ham gaplashgan va Kiyevni qo‘llab-quvvatlashga vaʼda bergan.
