Samarqandda 8-sinf qiz o‘g‘irlab ketilgani aytilmoqda
Holatga Bolalar ombudsmani rasmiy munosabat bildirdi.
Samarqand viloyatida 8-sinf o‘quvchisi bir guruh shaxslar tomonidan o‘g‘irlab ketilib, zo‘rlandi. Bu haqida Nemolchi.uz xabar berdi.
Maʼlum qilinishicha, 23 oktyabr kuni Samarqand viloyati tumanlaridan birida 8-sinf o‘quvchisi o‘g‘irlab ketilgan. Qarindoshlarining so‘zlariga ko‘ra, oradan maʼlum vaqt o‘tgach, ular qizlari yo‘qolgani haqida ariza yozishgan. Badanida zo‘ravonlik izlari bo‘lgan qiz 6 noyabr kuni topiladi. Qizning so‘zlariga ko‘ra, uni bir necha kun kaltaklab, spirtli ichimliklar va noqonuniy moddalar qabul qilishga majburlab, irodasiga qarshi ushlab turishgan va zo‘rlashgan.
Bolalar ombudsmani ushbu holat Samarqandning Qo‘shrabot tumanida sodir bo‘lganini maʼlum qildi.
Holat yuzasidan gumonlanuvchi shaxslarga nisbatan JKning 119-moddasi (Jinsiy ehtiyojni zo‘rlik ishlatib g‘ayritabiiy usulda qondirish) bilan jinoyat ishi qo‘zg‘atilgan bo‘lib, hozirda dastlabki tergov harakatlari olib borilmoqda.
Hozirda jinoyat ishi doirasida voyaga yetmagan qizga nisbatan tegishli sud-tibbiyot va biologik ekspertizalari tayinlangan.
