Kim Chen In Rossiyani qo‘llab-quvvatlashga vaʼda berdi
U Ukrainadagi hujumlarda G‘arbni ayblagan.
Shimoliy Koreya yetakchisi Kim Chen In Rossiyani Ukrainaga qarshi urushda to‘liq qo‘llab-quvvatlashga vaʼda berdi.
"Rossiya Mudofaa vaziri Andrey Belousovning Pxenyanga tashrifi chog‘ida KXDR yetakchisi Kim Chen In Moskvani so‘zsiz qo‘llab-quvvatlashiga ishontirdi. Kim Chen In, shuningdek, Rossiyaning Ukrainaga raketa zarbalarini “o‘zini himoya qilish harakati” deb atadi", deya xabar bermoqda Koreya Markaziy axborot agentligi.
Shimoliy Koreya rahbarining so‘zlariga ko‘ra, rus qo‘shinlari Rossiya suvereniteti va hududiy yaxlitligini gegemon imperialistik ambitsiyalardan himoya qilish bilan shug‘ullanmoqda.
Kim Rossiya Qurolli Kuchlari Ukraina hududiga ommaviy havo hujumlari uyushtirgani uchun aybni G‘arb davlatlariga yukladi. Uning taʼkidlashicha, AQSH boshchiligidagi G‘arb Ukrainaga bosim o‘tkazgan va uni uzoq masofali qurollari bilan Rossiya hududiga hujum qilishga "majbur qilgan" , bu esa "mojaroda to‘g‘ridan-to‘g‘ri harbiy ishtirok etish"ni anglatadi.
Noyabr oyi o‘rtalarida AQSH prezidenti Jo Bayden maʼmuriyati Rossiyaning Shimoliy Koreya qo‘shinlarini urushga jalb qilish qaroriga javoban Ukrainaga Vashingtondan olingan uzoq masofali qurollar bilan Rossiya hududiga chuqur zarbalar berish taqiqini bekor qilgan edi.
