"Barsa"ning so'nggi besh yillikdagi futbolchilari hozir qayerda?
Ayrim futbolchilar faoliyatini yakunlash arafasida, boshqalari esa jarohatlar sabab qiynalmoqda.
Ayni vaqtda "Barselona" jamoasi Ispaniya chempionatida yetakchilik qilmoqda. Biz bugun so'nggi besh yil davomida kataloniyaliklar safida o'ynagan futbolchilarning keyingi faoliyati qanday o'tayotgani haqida ma'lumot taqdim etamiz.
Klement Lenglet, 29 yosh
Lenglet hali ham "Barselona"ga tegishli, ammo klub himoyachi bilan umuman hisoblashmaydi. So'nggi ikki yil ichida u "Tottenhem"da ham, "Aston Villa"da ham o'ynashga muvaffaq bo'ldi. Hozirda esa "Atletiko Madrid" safida to'p surmoqda. 2018-yilda Klement Fransiyada eng istiqbolli himoyachilardan biri edi.
Filippe Koutinyo, 32 yosh
Braziliyalik futbolchining transferi futbol tarixidagi eng yomon transferlardan biri bo'lib qolmoqda. Bu Koutinyo yomon o'yinchi degani emas. Biroq, "Barselona"ga u kerak bo'lmadi. Braziliyalik futbolchi dastlabki olti oyda o'zini yaxshi ko'rsatdi, ammo keyinchalik o'yinida pasayish yuzaga keldi. 2019/2020-yilgi mavsumda u "Bavariya"ga ijaraga yuborildi, u yerda Xansi Flik boshchiligida ajoyib o'yinlar ko'rsatdi. 2022-yilda braziliyalik futbolchi "Aston Villa" safiga borib qo'shildi. Hozirgi kunda Koutinyo Brazliyaning "Vasko da Gama" klubida o'ynaydi. Filipp endigina 32 yoshda.
Martin Breytveyt, 33 yosh
Futbolchi "Barselona"dan so'ng "Espanyol"ga ko'chib o'tdi. U yerda esa klub bilan darhol Segundaga tushib ketdi va rahbariyat bilan kelisha olmay qoldi. Yevro-2024ga borish uchun u La Liga klubiga o'tmoqchi edi, ammo futbolchiga rad javobi berildi. Keyinchalik esa Martin "Espanyol"ning elitaga qaytishiga yordam berdi (39 o'yinda 22 ta gol). Yozda u boshqa jamoaga ko'chib o'tishga harakat qildi. Biroq, bu borada ham jamoa bilan kelisholmadi. Daniyalik nafaqat futbolchi, balki juda ham muvaffaqiyatli biznesmen hisoblanadi. Xabarlarga ko'ra, u 250 million dollarlik ulushga ega, futbolchi ko'chmas mulkka sarmoya kiritadi. Hozirda 33 yoshli forvard Braziliyaning "Gremio" jamoasida o'ynaydi.
Samuel Umtiti, 31 yosh
Olti yil oldin fransuz futbolchisi faoliyatining yuqori cho'qqisida edi: u La Liga, Jahon chempionatida g'olib chiqdi va dunyoning eng kuchli himoyachilaridan biri hisoblanardi. Ammo Samuel jarohatlar tufayli o'yin amalyotiga ega bo'lmay qoldi. Birinchi signal qo'ng'irog'i 2018-yil boshida tizzasini jarohatlaganida yangradi. Shifokorlar operatsiya qilishni qat'iy tavsiya qildi, ammo fransuz futbolchisi JChni o'tkazib yuborishdan qo'rqib, konservativ usullar bilan davolandi. Umtiti Rossiyaga sog'lig'idagi muammolar bilan keldi. Vaqt o'tishi bilan u o'z o'yinini yo'qotib bordi. "Barselona" esa himoyachidan qutulishga harakat qildi. Faqat 2023-yilda Umtiti shartnomani bekor qilishga rozi bo'ldi. 2024-yilning fevralida Samuel tizzasidan yana bir jarohat olib, safdan chiqdi va shundan beri maydonga tushmadi. Uning qachon qaytishi noma'lum, futbolchi shunchaki g'oyib bo'ldi. Mish-mishlarga ko'ra, Umtiti 31 yoshida faoliyatini yakunlash variantini jiddiy ko'rib chiqmoqda.
Memfis Depay, 30 yosh
Kuman qo'l ostida Depay klubga asosiy yulduz sifatida keldi, biroq olti oydan keyin Xavi qanot hujumchisiga unchalik ishonch bildirmadi. Memfis Luis Suaresning qarorini takrorlamoqchi bo'ldi va "Atletiko"ga yo'l oldi. Lekin u yerda zaxira futbolchisiga aylandi. Antuan Grizmann allaqachon o'zining asosiy roliga qaytgan edi. Bu yozda Depay Braziliyaning "Korintians" klubiga yo'l oldi va 14 uchrashuvda 7+4 natija qayd etdi. Ammo tez orada yangi jamoa izlashga to'g'ri kelishi mumkin. Sababi klub homiylardan ayrilishga yaqin turibdi, chunki ular Memfis talab qiladigan katta maoshni to'lay olmaydi.
