Qashqadaryoda gaz ballonlari o'girlandi
Dehqonobod tumanida suyultirilgan gaz ta’minotidagi qonunbuzilish holatlari bo‘yicha o‘rganish o‘tkazilgan.
“Hududgaz Qashqadaryo” gaz ta’minoti filiali komplayens nazorat tuzilmalari, huquq-tartibot organlari xodimlari bilan hamkorlikda Qashqadaryo viloyatining Dehqonobod tumanida suyultirilgan gaz ta’minotidagi qonunbuzilish holatlarini aniqlash bo‘yicha o‘rganish o‘tkazildi.
Joriy yilning 12-dekabr kuni tuman suyultirilgan gaz xizmati ta’minotchi-chilangari hamda maxsus avtotransport vositasi haydovchisi “Tog‘aytemir” MFY iste’molchilariga yetkazib berilishi lozim bo‘lgan 100 dona maishiy gaz ballonlarni mazkur mahallada istiqomat qiluvchi fuqaroning xonadonida tashkil etilgan “bunker”ga tushirayotgani aniqlangan. Xonadon ko‘zdan kechirilganda olib kelingan ballonlardan tashqari yana 101 ta bo‘sh maishiy gaz ballonlar borligi ma’lum bo‘lgan.
Ayni vaqtda holat yuzasidan dalolatnoma tuzilib, barcha hujjatlar huquqni muhofaza qiluvchi organlar va FVBga taqdim etilgan.
