12 yoshli qiz aviakompaniyani sudga berib, yutib chiqdi
Kompaniya unga tovon puli to‘laydigan bo‘ldi.
Qozog‘istonda 12 yoshli qiz “AIR Astana” aviakompaniyasini sudga berib, yutib chiqdi. Sud aviakompaniya tomonidan o‘smirga tovon puli undirish bo‘yicha hukm chiqardi. Bu haqida mahalliy nashrlar xabar bermoqda.
Qayd etilishicha, aviakompaniya uralsklik 12 yoshli yo‘lovchi Zere Galiyevaga qarshi apellyatsiya sudida yutqazib qo‘ydi. Qizga bortga chiqish taloni berilmagan va u Ostona aeroportida yolg‘iz qoldirilgan.
Eslatib o‘tamiz, holat 2024 yilning 20 iyulida sodir bo‘lgan. O‘n ikki yoshli egizak qizlar Zere va Zaure Galiyevalar AQSHdan Ostona orqali Uralskka qaytayotganda ulardan biri bortga chiqarilmgan.
“FlyArystan” 188 o‘rinli samolyotni 180 o‘rinli samolyotga almashtirgan.
Joy yetishmasligi sababli Zere samolyotga chiqa olmagan yagona yo‘lovchi bo‘lgan. Shundan so‘ng bola Ostona aeroportida qoldirib ketilgan va ertasi kuni yolg‘iz o‘zi Uralskka uchib keta olgan.
Bu bo‘yicha shikoyat Olmaota shahri Tuksib tuman sudida ko‘rib chiqilgan. Unda “Air Astana” kompaniyasi vakillari yo‘lovchining onasi tomonidan bildirilgan eʼtirozlarini tan oldi, biroq talab qilingan tovon pulini 5 million tengedan 1,5 million tengegacha kamaytirishni so‘rashdi. Lekin bu sud tomonidan qanoatlantirilmadi.
Zahro Fayziyeva tayyorladi
