Gruziyada otishma sodir bo‘ldi
Hozirda holat yuzasidan jinoyat ishi qo‘zg‘atilgan.
Gruziya poytaxti Tbilisida qurolli hujum uyushtirildi. Chavchavadze prospektida noma’lum shaxs (shaxslar) kafedan chiqayotgan ikki kishiga o‘q uzgan. Otishma natijasida bir kishi halok bo‘lgan, yana biri jarohatlangan.
Guvohlarning so‘zlariga ko‘ra, hodisa joyida 7-8 ta o‘q ovozi eshitilgan. Zudlik bilan voqea joyiga huquq-tartibot organlari va tez yordam xodimlari yetib kelgan, jarohatlangan shaxs kasalxonaga yetkazilgan.
Ma'lumotlarga ko‘ra, halok bo‘lgan shaxs Moskvada biznes bilan shug‘ullangan, bu suiqasd biznes nizolar bilan bog'liq bo'lishi mumkin deb taxmin qilinmoqda.
Gruziya Ichki ishlar vazirligi ushbu hodisa yuzasidan "qasddan odam o‘ldirish" va "noqonuniy qurol savdosi" moddalari bo‘yicha jinoiy ish ochdi. Hozirda tergov olib borilmoqda.
