Samarqanddagi kutubxonada yong‘in chiqdi
Hodisa joyiga 6 ta ekipaj jalb qilingan.
Kecha, 14-mart kuni soat 22:50 da Samarqand shahrida joylashgan viloyat Maktabgacha va maktab taʼlimi boshqamasi tasarrufidagi kutubxonada yong‘in sodir bo‘lganligi to‘g‘risida viloyat FVBga xabar berilgan.
Shunga ko‘ra, 6 ta yong‘in qutqaruv ekipajlari jalb qilinib, voqea joyiga soat 22:57 da yetib borib, soat 23:55 da yong‘in to‘liq bartaraf etilgan.
Yong‘in natijasida binoning shift va tom qismi qisman yonib zararlangan. Hodisa oqibatida jabrlangan va halok bo‘lganlar yo‘q. Ushbu yong‘in kutubxonaning maʼmuriy binosida sodir bo‘lgan hamda kutubxonadagi kitoblarga hech qanday zarar yetmagan.
Hozirda tergovga qadar tekshirish ishlari olib borilib, yong‘inning kelib chiqish sababi aniqlanmoqda.
