Rossiyadagi noqonuniy ukrainaliklar uchun talablar belgilandi
2025-yil 10-sentabrgacha maqomini qonuniylashtirish shart.
Rossiya prezidenti Vladimir Putin Rossiya hududida noqonuniy yashayotgan Ukraina fuqarolari 2025-yil 10-sentabrga qadar huquqiy maqomini tartibga solishi yoki mamlakatni tark etishi shartligi haqidagi farmonni imzoladi.
Xabarlarga ko‘ra, farmon Rossiya Federatsiyasining migratsiya siyosatini takomillashtirish maqsadida qabul qilingan va rasmiy huquqiy axborot portalida e’lon qilingan.
Hujjatga ko‘ra, Rossiyada yashash uchun rasmiy asosga ega bo‘lmagan ukrainaliklar belgilangan muddatgacha mamlakatni o‘z ixtiyori bilan tark etishi yoki yashash maqomini qonuniylashtirishi lozim.
Shuningdek, Ichki ishlar vazirligiga 2025-yil 10-sentabrga qadar hujjat topshirgan ukrainaliklarga barmoq izlari, suratga olish va tibbiy tekshiruvdan o‘tish jarayonida migratsiya qoidalarini buzganlik uchun jazo qo‘llamaslik bo‘yicha ko‘rsatma berildi.
Bundan tashqari, Rossiya Sog‘liqni saqlash vazirligi mazkur muddat ichida Ukraina fuqarolarining tibbiy ko‘rikdan o‘tishini ta’minlashi lozim.
Eslatib o‘tamiz, 2024-yil fevral oyidan buyon Rossiyada noqonuniy migrantlarni deportatsiya qilish tartibi joriy etilgan. Ularga 30-aprelgacha mamlakatda qolish huquqini qonuniylashtirish yoki Rossiyani tark etish majburiyati yuklatilgan.
