Yevropa Ittifoqi tuxum inqirozini e’lon qildi
Parranda grippi Yevropada tuxum taqchilligiga sabab bo‘lmoqda.
Yevropa Ittifoqida tuxum bozorida jiddiy inqiroz yuzaga kelgani e’lon qilindi. Yevropa Parlamenti a’zosi Daniel Buda ushbu masala bo‘yicha Yevrokomissiyaga murojaat qilib, zarur choralar ko‘rishni talab qildi.
Parlamentariyga ko‘ra, tuxum ta’minotidagi muammolarning asosiy sababi qush grippining keng tarqalishi bo‘lib, ayniqsa, Polshada millionlab parrandalar nobud bo‘lishi bozordagi beqarorlikka olib kelgan. Bu esa qishloq xo‘jaligi sektoriga ham salbiy ta’sir ko‘rsatmoqda.
Buda Yevrokomissiyadan zarar ko‘rgan ishlab chiqaruvchilarni qo‘llab-quvvatlash va tuxum ta’minotidagi muammolarni bartaraf etish bo‘yicha qanday choralar rejalashtirilayotganini tushuntirishni so‘radi.
Avvalroq, 2024-yilning oktyabr oyida Reuters Yevropada parranda grippi holatlari ortib borayotgani va bu tuxum ta’minotida jiddiy muammolar keltirib chiqarishi mumkinligi haqida ogohlantirgan edi. Shu bilan birga, AQShda ham tuxum taqchilligi kuzatilgan bo‘lib, narxlarning oshishi sababli do‘konlar mahsulot sotib olishga cheklovlar joriy qilishga majbur bo‘lgan.
