Endi yo‘l qoidasini buzganlarning bilimi joyida tekshiriladi
Bu yangilik haydovchilar orasida turlicha munosabat uyg‘otmoqda.
Qirg‘izistonda 1 sentyabrdan boshlab yo‘l harakati qoidalarini buzgan haydovchilar to‘xtash joyida tezkor bilim sinovidan o‘tkaziladi. Agar haydovchi YPX inspektorining savollariga to‘g‘ri javob bera olmasa, uning haydovchilik guvohnomasi vaqtincha olib qo‘yiladi.
Bu haqida Qirg‘iziston prezidenti matbuot kotibi Asqat Alagozov maʼlum qildi. Унинг so‘zlariga ko‘ra, tashabbus prezident Sadir Japarov topshirig‘i bilan amalga oshirilmoqda va yo‘l-transport hodisalarini kamaytirish maqsadini ko‘zlaydi.
Haydovchi istalgan vaqtda “Unaa” davlat agentligi orqali test topshirib, guvohnomasini qaytarib olishi mumkin. Agar birinchi urinish muvaffaqiyatsiz bo‘lsa, u keyinchalik qayta topshirish imkoniyatiga ega bo‘ladi.
Biroq qayta topshirish bepul emas: 1-urinish – 500 som (taxminan 75 ming so‘m); 2-urinish – 1 000 som (taxminan 151 ming so‘m); 3-urinish – 2 000 som (taxminan 302 ming so‘m); 4-urinish – 4 000 som (taxminan 604 ming so‘m).
Alagozovning taʼkidlashicha, test jarayoni videotasvirga olinadi, bu esa shaffoflikni taʼminlash va inspektorlarni nohaq ayblashning oldini olishga xizmat qiladi.
Qirg‘iziston rasmiylarining maʼlumotlariga ko‘ra, 2020 yilgacha haydovchilik guvohnomalarining katta qismi qonunbuzarlik yo‘li bilan berilgan. Ko‘pchilik o‘qish o‘rniga pul evaziga guvohnoma olgan.
Hozir bunday amaliyot to‘xtatilgan bo‘lsada, yo‘llarda asosiy qoidalardan bexabar haydovchilar hali ham uchrab turibdi. Shu sababdan hukumat haydovchilar bilimini qatʼiy nazorat ostiga olishga qaror qilgan.
Bu yangilik haydovchilar orasida turlicha munosabat uyg‘otmoqda. Ayrimlar uni yo‘l harakati xavfsizligini oshirish yo‘lida muhim qadam deb hisoblayotgan bo‘lsa, boshqalar bu qo‘shimcha qiyinchilik va xarajat ekanini aytib, norozilik bildirmoqda.
