Yangiyo‘ldagi bog‘chaga kran o‘qi qulab tushdi
Oqibatda bog‘cha binosining tom qismi zarar ko‘rgan.
Toshkent viloyati Yangiyo‘l shahrida joylashgan 5-sonli bolalar bog‘chasi tomiga qurilish maydonchasida o‘rnatilgan kran o‘qi qulab tushdi. Rasmiylar maʼlumotiga ko‘ra, hodisa 25-mart kuni yomg‘ir sababli yuz bergan.
Oqibatda bog‘cha binosining tom qismi zarar ko‘rgan. Mutasaddilar zudlik bilan yetib borib, qulagan kran qismini olib tashlashdi va taʼmirlash ishlarini boshlashgan. Qurilish tashkiloti tomonidan shikastlangan tom qismini tiklash ishlari uch kun ichida yakunlanishi aytilmoqda.
Bog‘cha faoliyati vaqtincha to‘xtatildi, biroq hodisa natijasida hech kim jarohat olmagan. Rasmiylar bog‘cha xavfsizligi taʼminlangach, uning odatiy faoliyatiga qaytishini bildirdi.
