Dunyodagi eng keksa mushuk 30 yoshga to‘ldi
30 yoshli Millie Ginnes rekordiga da’vogarlik qilmoqda.
Buyuk Britaniyaning Stokport shahrida yashovchi 70 yoshli Lesli Grinxough o‘zining Millie ismli mushugi 30 yoshga to‘lganini va uni dunyodagi eng keksa mushuk deb hisoblashini aytmoqda. Millie o‘zining uzoq umri bilan ko'pchilikning e’tiborini tortmoqda.
Mushuk egasining so‘zlariga ko‘ra, Millie sog‘lom turmush tarzini olib boradi – u tushgacha uxlaydi, losos va qisqichbaqalar iste’mol qiladi, shishadagi tabiiy mineral suv ichadi va divanda erkalanishni yaxshi ko‘radi. Shu bilan birga, mushuk juda ehtiyotkor va uyatchan, shuning uchun u yillar davomida ko‘chaga chiqmay, faqat uy sharoitida yashagan.
Grinxoughning aytishicha, Millie 1995-yilda tug‘ilgan va dastlab uning rafiqasiga tegishli bo‘lgan. Mushukning 30 yillik yubileyi sharafiga egasi tug‘ilgan kun tortiga buyurtma berib, unda Millie suratini aks ettirgan. U mushugini Ginnes rekordlar kitobiga kiritishni istaydi, biroq hozircha uning yoshini rasman tasdiqlay olmaydi.
Ma’lumotlarga ko‘ra, mushuklarning o‘rtacha yoshi 13-20 yil atrofida bo‘ladi. Hozirgacha rasmiy rekord egasi sifatida Texasdan Cream Puff ismli mushuk tan olingan bo‘lib, u 38 yil va 3 kun yashagan. Millie esa bu natijaga yaqinlashish yo‘lida davom etmoqda.
