Germaniya AQSHdan oltin zaxirasini qaytarib olishga tayyorlanmoqda
Berlin 1200 tonna oltinni Vashingtondan olib chiqmoqchi.
Ma'lum qilinishicha, Germaniya hukumati AQShdagi 1200 tonna (113 milliard yevroga teng) oltinini mamlakatga qaytarib olishni rejalashtirmoqda. Ushbu qaror, Donald Trampning Yevropa Ittifoqiga savdo bojlari joriy qilishi mumkinligi haqidagi bayonotlari sabab qabul qilindi.
Germaniya rasmiylari bayonotiga ko‘ra, Trampning o‘zgaruvchan tashqi siyosati Berlinni ogohlikka chaqirgan. Endilikda Germaniya Qo‘shma Shtatlarni "ishonchli hamkor" deb hisoblamayotgani ta’kidlanmoqda.
Hozirda Germaniya dunyodagi eng katta oltin zaxirasiga ega ikkinchi davlat sanaladi. Bu zaxiralarning 37 foizi AQShda, asosan Federal Rezerv tizimining Nyu-Yorkdagi bo‘limida saqlanadi. Ular, zarurat tug‘ilganda, oltinni tezda AQSh dollari yoki boshqa barqaror valyutalarga aylantirish imkonini beruvchi kafolat sifatida xizmat qilgan.
Ammo global siyosiy ishonchsizlik kuchaygani sari, Germaniya o‘z moliyaviy xavfsizligini mustahkamlash maqsadida ushbu oltinni o‘z hududiga olib chiqishga harakat qilmoqda.
