Tramp o‘z golf klubida o‘ziga haykal qo‘ydi
Haykalda u musht ko‘tarib turgan holatda tasvirlangan.
AQSh prezidenti Donald Tramp o‘zining Tramp xalqaro golf klubida o‘z shaxsiy haykalining ochilish marosimini o‘tkazdi. Haykal Trampga “Sticker Mule” bosh direktori va sobiq kongress nomzodi Entoni Konstantino tomonidan sovg‘a qilingan.
Tadbir haqida Konstantino o‘zining X (sobiq Twitter) ijtimoiy tarmog‘idagi sahifasida xabar bergan. Xabarda aytilishicha, “Bo‘ysunmaslik yodgorligi” deb nomlangan bu haykal endi golf klubda doimiy ravishda namoyish etiladi. Haykal tosh poydevorga o‘rnatilgan bo‘lib, poydevorga Entoni Konstantinoning ismi ham o‘yib yozilgan.
Haykal Donald Trampni 2024-yil iyul oyida qilgan mashhur musht ko‘tarilgan holatda tasvirlaydi. U golf klubi binosi va 27 chuqurli golf maydonining birinchi belgilangan joyiga o‘rnatilgan.
