Tunis sobiq bosh vaziri 34 yilga qamaldi
U terrorizmga oid ishda aybdor deb topilgan.
Tunisda sobiq bosh vazir Ali Loraed terrorizmga oid ayblovlar bo‘yicha 34 yilga ozodlikdan mahrum etildi. Ali Loraed 2011–2013 yillarda ichki ishlar vaziri, 2013–2014 yillarda esa bosh vazir lavozimida ishlagan, shuningdek, u “An-Nahda” partiyasining yetakchilaridan biri hisoblanadi. Sud hukmiga ko‘ra, u jangarilarni Tunis tashqarisidagi mojaroli hududlarga yuborish bilan bog‘liq ishda aybdor deb topilgan.
Ali Loraed 2022 yildan beri hibsda saqlanmoqda. Shu ish doirasida yana 7 kishi 18 yildan 36 yilgacha qamoq jazosiga hukm qilingan. 2024 yil fevral oyida esa “An-Nahda” partiyasi rahbari va sobiq parlament spikeri, 83 yoshli Roshid al-Gannushiy ham 22 yil qamoq jazosini olgan edi.
Ma’lumot uchun, 2021 yilda Tunisda hayot darajasi keskin yomonlashganidan so‘ng ommaviy noroziliklar yuz bergan, prezident Qays Sayid parlamentni tarqatib, hukumatni iste’foga chiqargan edi. Keyinchalik referendumda yangi konstitutsiya qabul qilinib, prezident vakolatlari kengaytirildi. Tanqidchilar bu jarayonni demokratiyadan chekinish deb baholamoqda.
