Britaniya tarixida ilk bor ayol MI6 rahbari etib tayinlandi
Ayol ilk bor Buyuk Britaniya maxfiy xizmatiga boshchilik qiladi.
Buyuk Britaniya tarixida ilk bor ayol kishi — Blez Metreveli — MI6 (Tashqi razvedka xizmati) boshlig‘i etib tayinlandi. Bu haqda Bosh vazir Kir Starmer rasmiy bayonot orqali ma’lum qildi. Unga ko‘ra, ushbu tayinlov hozirgi xavfsizlik muammolari va global tahdidlar fonida nihoyatda dolzarb hisoblanadi.
47 yoshli Metreveli Kembrij universitetida antropologiya bo‘yicha tahsil olgan. U MI6 tizimiga 1999-yilda qo‘shilgan va o‘z faoliyatining asosiy qismini Yevropa hamda Yaqin Sharqdagi missiyalarga bag‘ishlagan. Hozirda u razvedkaning texnologik bo‘limiga rahbarlik qilmoqda. Unga qadar xizmatga besh yil davomida Richard Mur boshchilik qilgan.
May oyida The Times gazetasi ushbu lavozim uchun bir nechta ayol nomzod ko‘rib chiqilayotganini xabar qilgan edi. Shular orasida sobiq Xitoydagi elchi Barbara Vudvord nomi tilga olingan, biroq uning Xitoy bilan iliq aloqalari tanqidga uchragan.
Blez Metrevelining tayinlanishi nafaqat tarixiy burilish, balki Britaniya razvedka tizimida gender tengligiga yo‘l ochuvchi qadam sifatida ham baholanmoqda.
