“Yana nomzodimni qo‘yish huquqiga egaman” — Tramp
AQSh prezidenti 2020-yilgi saylovlar soxtalashtirilganini da’vo qilib, uchinchi muddatga nomzodini qo‘yish huquqi borligini aytdi.
Donald Tramp Ayova shtatida tarafdorlari bilan uchrashuvda uchinchi muddatga prezidentlikka nomzodini qo‘yish masalasi haqida gapirdi. Bu haqda CNN xabar berdi.
Tramp o‘z nutqida qonunchilik unga yana nomzod bo‘lishga ruxsat bermasligini aytgan. Uning ta’kidlashicha, u bu masalani uzoq vaqt o‘rgangan, biroq qonundagi cheklovlar juda aniq ifodalangan.
“Menimcha, qonunda yana nomzodimni qo‘ya olmasligim aytilgan. Men bu matnni uzoq vaqt o‘rgandim”, — dedi AQSh prezidenti.
Shunga qaramay, Tramp uchinchi muddatga nomzodini qo‘yish huquqiga ega ekanini ta’kidlagan. U bunga sabab sifatida 2020-yilgi prezidentlik saylovlarida demokratlar tomonidan firibgarlik sodir etilgani haqidagi da’volarini keltirgan.
“Ular firibgarlik qilishdi. Ular saylovlarni soxtalashtirishdi. Demokratlar o‘sha saylovlarni soxtalashtirishdi — biz juda yaxshi ishladik. Yo‘q, biz uch marta g‘alaba qozondik, lekin mayli... Menimcha, yana nomzodimni qo‘yish huquqiga egaman”, — degan Tramp.
Biroq Trampning 2020-yilgi saylovlar haqidagi da’volari uchinchi muddatga nomzod bo‘lish uchun qonuniy asos yaratmaydi. AQSh Konstitutsiyasiga 1951-yilda kiritilgan 22-tuzatishga ko‘ra, bir shaxs prezident etib ikki martadan ortiq saylanishi mumkin emas.
Tramp ilk bor 2016-yilgi saylovlarda g‘alaba qozonib, 2017-yil yanvarida prezident lavozimini egallagan. U 2020-yilgi saylovlarda demokrat Jo Baydenga yutqazgan, 2024-yilgi saylovlarda esa yana g‘alaba qozonib, 2025-yil yanvarida prezidentlikning ikkinchi muddatini boshlagan. Uning amaldagi prezidentlik muddati 2029-yil yanvarida yakunlanishi kerak.
