Qo‘shma deklaratsiya, OAV uchun maxsus bayonot va bayramona konsert: Shavkat Mirziyoyevning Mo‘g‘ulistonga tashrifida nimalar bo‘ldi?
Ikki tomonlama munosabatlar tarixida birinchi bo‘lgan ushbu tashrif ko‘p qirrali O‘zbekiston–Mo‘g‘uliston aloqalarini rivojlantirishda yangi bosqichni boshlab bermoqda.
Davlat tashrifi bilan Mo‘g‘ulistonda bo’lgan Shavkat Mirziyoyev bulan Uxnaagiyn Xurelsux o‘rtasida tor doiradagi va rasmiy delegatsiyalar ishtirokidagi muzokaralar bo‘lib o‘tdi. Davlatimiz rahbari Mo‘g‘uliston yetakchisiga samimiy qabul va rasmiy tashrif taklifi uchun minnatdorlik bildirdi.
Tashrif ikki davlat o‘rtasidagi ko‘p qirrali aloqalarni rivojlantirishda yangi bosqichni boshlab berdi. Muloqot chog‘ida barcha darajadagi aloqalar faollashgani, tovar ayirboshlash hajmi ortib borayotgani, sog‘liqni saqlash, ta’lim, elektron savdo, qishloq xo‘jaligi va qurilish materiallari ishlab chiqarish kabi yo‘nalishlarda ilk hamkorlik loyihalari amalga oshirilayotgani ta’kidlandi. Ulan-Batorda O‘zbekiston mahsulotlari uchun savdo uyi ham ochildi.
Muzokaralar davomida iqtisodiy kooperatsiyani chuqurlashtirish, imtiyozli savdo va investitsiyalarni himoya qilishga doir bitimlarni tezlashtirish, sanoat, tog‘-kon, qishloq xo‘jaligi, transport, ta’lim va ekoturizm kabi ustuvor yo‘nalishlar bo‘yicha yangi tashabbuslar ilgari surildi. Shuningdek, O‘zbekiston Geologiya vazirligining vakolatxonasi Ulan-Batorda ochilgani mamnuniyat bilan qayd etildi.
Uchrashuv asnosida Prezidentlar keng qamrovli sheriklik to‘g‘risidagi qo‘shma deklaratsiyani hamda sog‘liqni saqlash, oliy ta’lim, sport, jinoyatchilikka qarshi kurashish, qishloq xo‘jaligi va madaniyat sohalarida hamkorlikni nazarda tutuvchi hujjatlarni imzoladilar. Tashqi ishlar va savdo vazirliklari o‘rtasida 2026-2028-yillar uchun hamkorlik dasturlari ham tasdiqlandi.
Davlat rahbarlari shuningdek ikki davlat OAV vakillari uchun uchrashuvda ishtirok etib, o‘zaro do‘stlik va hamkorlikning yangi bosqichi boshlanganini ta’kidladilar. Xususan, O‘zbekiston Prezidenti Mo‘g‘uliston xalqini Xalq inqilobi kuni bilan tabriklab, mamlakatda kechayotgan islohotlar, ijtimoiy-iqtisodiy yutuqlar va xalqaro nufuzning oshib borayotganini e’tirof etdi.
Muzokaralarda O‘zbekiston-Mo‘g‘uliston iqtisodiy hamkorligini yangi bosqichga olib chiqish, transport bog‘liqligini mustahkamlash, aviaqatnovlarni yo‘lga qo‘yish, oliy ta’lim kvotalarini kengaytirish va madaniy almashinuvlarni kuchaytirish bo‘yicha muhim kelishuvlarga erishildi.
Tashrif doirasida ikki davlat rahbarlari san’at ustalari konsert dasturida ham ishtirok etib, xalqlarimiz do‘stligining madaniy ifodasiga guvoh bo‘ldilar. Konsert O‘zbekiston-Mo‘g‘uliston aloqalarida yangi davr boshlanganining ramziy ifodasi bo‘ldi.
