Mumbayda 3 yil davomida uydan chiqmagan erkak axlatlar orasidan topildi

Hindistonning Mumbay shahrida 3 yil davomida ijtimoiy hayotdan butunlay chekinib, uyi ichida yashab kelgan erkak axlat va chiqindilar orasida topildi. Bu haqda The Indian Express nashri xabar berdi.

 

Ma’lumotlarga ko‘ra, 55 yoshli sobiq dasturchi Anup Kumar Nair chuqur depressiyaga tushib, yaqinlarining vafotidan so‘ng jamiyatdan ajralgan va ijtimoiy aloqalarni to‘liq uzgan. Yillar davomida yolg‘izlikda yashagan erkakni SEAL (Social and Evangelical Association for Love) nomli xayriya tashkiloti ijtimoiy xodimlari aniqlagan.

 

Nair yashayotgan xonadon tashrif chog‘ida axlat, oziq-ovqat qoldiqlari, singan mebellar va boshqa chiqindilar bilan to‘lib-toshgani aniqlangan. U so‘nggi uch yil davomida faqat onlayn buyurtmalar orqali oziq-ovqatlar olgan. Shuningdek, uning oyog‘ida jiddiy infeksiya aniqlanib, tez tibbiy yordam ko‘rsatildi.

 

Ayni paytda u vaqtincha xayriya tashkilotining boshpanasida yashamoqda. Uning so‘zlariga ko‘ra, do‘stlari yo‘q va sog‘lig‘i yomon bo‘lgani uchun yangi ish topish imkoniyati mavjud emas.

 

Nairning qo‘shnilaridan biri shunday deydi:

“Biz bir necha bor unga yordam taklif qildik, uyi ichidagi holatni tozalashga ham urinib ko‘rdik. Shuningdek, ota-onasining bank omonatini uning shaxsiy hisobiga o‘tkazishda ko‘mak berdik”.