AQSh sudi Google’ni 314 million dollar jarimaga tortdi
Android foydalanuvchilarning ma’lumotlarini yashirincha to‘plagani uchun kompaniyaga chora ko‘rildi.
AQShning Kaliforniya shtati sud hay’ati Google kompaniyasini Android foydalanuvchilarning roziligisiz ularning shaxsiy ma’lumotlarini noqonuniy tarzda yig‘ganlik ayblovi bo‘yicha 314 million dollar to‘lashga majbur qildi. Bu haqda Bloomberg xabar berdi.
Da’vogarlarga ko‘ra, Google’ning bosh kompaniyasi Alphabet Inc Android qurilmalarini hatto Wi-Fi tarmog‘iga ulanmagan holatda ham ma’lumotlarni o‘z serverlariga uzatishga sozlagan. Shu orqali foydalanuvchilarning pulli mobil internet trafiklaridan foydalanilgan va bu ma’lumotlar kompaniya tomonidan maqsadli reklamalarni kuchaytirish hamda xaritalash xizmatlarini rivojlantirishda ishlatilgan.
Bu holat Google’ning maxfiylik siyosatiga oid so‘nggi sud ishlaridan biridir.
Google vakili sud qaroriga rozi emasliklarini bildirib, apellyatsiya shikoyati kiritilishini ma’lum qildi. Unga ko‘ra, Android foydalanuvchilari qurilma sozlamalari va xizmat ko‘rsatish shartlarini qabul qilish orqali ma’lumot almashishga rozilik bildirgan bo‘ladi.
Kaliforniya aholisi nomidan berilgan jamoaviy da’vo 2019 yilda Santa Klara Oliy sudiga kiritilgan. Shu bilan birga, butun AQSh bo‘ylab Android foydalanuvchilari ishtirokida yana bir federal ish ko‘rib chiqilmoqda. Unga oid sud jarayoni 2026 yil boshiga belgilangan.
