Rossiyalik bemorning oshqozonidan 27 ta zajigalka olib tashlandi
Bemor bu jismlar oshqozoniga qanday tushib qolgani haqida izoh bermagan.
Rossiyaning Tuva Respublikasi, Qizil shahrida joylashgan tibbiyot muassasasida shifokorlar 56 yoshli erkak bemorning oshqozonidan 27 dona zajigalka va bir dona tangani olib tashladi. Bu haqda mk.ru nashri xabar berdi.
Begona jismlar bemorning oshqozonida kompyuter tomografiyasi orqali aniqlangan. Jarayon so‘ngida bemor umumiy behushlik ostida endoskopik usul bilan operatsiya qilingan. Operatsiyada endoskopiya bo‘limi xodimlari va anesteziologlar ishtirok etgan.
Shifokorlarning aytishicha, bu holat tibbiyot amaliyotida kam uchraydigan va e’tiborga molik operatsiyalardan biri hisoblanadi. Ayniqsa, bu miqdordagi begona jismlarni jarrohlik aralashuvisiz olib tashlash — noyob tajriba sifatida baholanmoqda.
Bemor buyumlar oshqozoniga qanday kirib qolgani haqida hech qanday izoh bermagan.
